Laganini Palmižana…gastro raj na škoju…

Puno je lipi i prilipi mista na svitu ali je jedna Palmižana. Na južnoj bandi škoja je pravi raj na zemji okružen kristalno čistin Jadranskin morem…da vidimo koje to lipe štorije o Laganiniju kolaju u gastro krugovima.

I tako se mi dvoje Ona i ja zaputimo prima Foru. Veliki Meštar od kužine Hrvoje Zirojević je posla škojskoga Bosanca da nas pokupi sa radnin gliserom kojega duperaju za brzi dovod spize i svega ostalega ča je potribno jemat na škoju. Za vrime vožnje smo se tako smijali da nan je to odma otvorilo apetit. A ovo Bosanac je uvjetno to ga zovu onako iz zafrkancije.

Uplovjavanje u Palmižansku valu je poseban doživjaj ravno isprid nas je prekrasno imanje od Dagmar Meneghello a desno od nje je naš cilj…Laganini…spoj prirode i nastambi napravjeni od vridni ljudski ruku to van je prekrasni Laganini sva lipota i harmonija Dalmacije je ovod. U sjeni borova i mnogi drugi maditeranski cabala je sa puno ukusa u jednostavneme casual stilu napravjeno prekrasno misto vrhunskoga hedonizma oli ti po Dalmatinski pravega gušta.

Na našem Jadranu je bilo puno pokušaja da se uz more napravi ovako ništo ali po sistemu ajmo sezonu dvi ubit lovu i gremo daje. Da bi se ovako ništo ka Laganini ostvarilo potribna je vizija, voja za lavuron i najglavnije vrhunska kvaliteta u prekrasno uređenom prostoru, gastro ponuda apsolutno najviše kategorije i personal koji zna posal i edukativan je u svome poslu, diskretan, komunikativan i sa potrebnon dozon ležernosti. Sve ove vrijednosti su mogu doživit kod Laganinija.

Najlogičnije je da se na ovakvom izazovnom mistu pozove po meni najboje u Cro gastronomiji Meštar od kužine Hrvoje Zirojević. Sa svoja dva vrlo perspektivna i radoholična asistenta Hrvoje stvara prava gastro čuda…

Mi smo ma ni sam ne znam koliko sljedova kušali ali mi je jedno od njih ostalo zacimentano u pamčenju…tripice od grdobine…ma stvarno tribaš bit pozitivno lud da ovako ništo skuvaš…Hrvoje mi je otkrija koji koktel začina dodaje da bi se dobija tako poseban šug i okus…nevjerovatno…za mene su tripice od grdobine najboja riceta koja se u Cro izmislila otkad san ja u ovoj branši a to je počelo 60ti godina…

U ugodneme razgovoru mi je Hrvoje reka da mu je glava puna ideja samo nima vrimena jerbo vrime gre i nemoš ga fermat…zovu ga sa svi strana svita…reka san mu znan da si samozatajan, skroman i da nisi ka drugi koji su više u publicitetu ma aj se ti lipo zafali nevjerojatnim ponudama iz cilega svita da in održavaš inovativne gastro radione i uvati se kužinavanja, stvaranja novih vridnosti na našoj vrlo interesantnoj gastro scenu u Cro.

A na kraju ovo ča smo mi kušavali nebi tija daje komentirat ma nije red…eto zamisli da mi slučajno izleti koja kriva rić…ništa…evo van fotke pa maštaje ča bi to sve na pijatima i padelama moglo bit.

Na kraju dvi tri rići o našem osobnome somelieru i Hrvojevu čoviku od velikoga povjerenja…

Za nevirovat kako nas je Mate na jedan skroman, judski ali vrlo profesionalni način prošetao po svin vinskin regijama naše nan Domovine…od Fora, Pelješca, Istre, Slavonije pa do par mini lokacija sridnje Dalmacije…pilo se pilo a bome je i miritalo jerbo ovake delicije na pijatima i u padelama su jidu uz top vina…St.Hills…Matošević…Sladić…Clai…Šipun…Krajančić…Korak…Cuj…Korta Katraina…Kozlović…puno mi je drago da je na vinskoj karti deboto sve najboje ča se u Cro proizvodi…a udio stranih vina je vrlo simboličan i to je po meni prava stvar…bravo.

 

Ekipa,…bilo nan je fenomenalno a vrime je tako brzo proletilo…počeli smo oko podneva pa do pete ure…ovo je pravi put…put inovativnosti…put vrhunske usluge…