vinarija Ivica Milan / Kaštel Novi
Ma Ivica i ja smo deboto susidi ali nikako da uvatin vrimena pa povirin pod odrinu i bacin čakulu o legendarnome vinogradu iza Stomorije di je Ivica tamo nidi 1994 posadije Pošip…
Svitu moj ovi vinograd mu je bila avantura života ma bilo je u ono vrime u Kaštilima pribacivanja ono ka ma daj Ivica kalaj malo donija si plenke sa Korčule i sa se ništo praviš važan da će u Kaštilima bit kvalitetni Pošip…
Nima veze Ivica je bija tvrdoglav i nakon puno godin je pokaza vinskome svitu da je napravija najboji potez u životu…da se odma ogradin izuzetek je vinčanje sa Sonjom i poslin nijova dva stasita sina…liva i desna ruka Ivice u svakodnevnin poslovima u vinogradu i vinariju…dok Sonja drži sve kantune kuće eto tako da je sve posloženo da nemore bit boje…
Evo nas ispod odrine uz dakako bocu Pošipa iz 2018e sa zero pršuta sira i još par zalogaje je pala priko lipa čakula…najviše me je dojmilo Ivicin pristup rezidbi i modelu vinograda…nakon godina experimetiranje je doša do spoznaje da je najboje spajat redove da se stvori tunel di bi lišče bilo gori a grozdi bi ispod u sjeni visili…to je sad ajmo reč kod Ivice postalo normalno osunčani listovi primaju svitlost a grozdi su zaštičeni od sunca i imaju mogučnost optimalnoga razvoja…
Kad jedna mala vinarija proizvede visoko kvalitetno vino koje se visoko boduje ka npr. berba 2020 sa 88 punti onda je to mamac za jadne & primitivne & kriminalne vinare iz Italije tamo nidi u provinciji Veneto koji su kopirali etiketu ulili niko talijansko bilo vino sorta paštroč i evo ga u Norveškoj prodaju za 143 Nor. krune…ma stvarno svašta na oveme svitu moremo doživit…dakako Talijani “vino” prodaju vanka EU jerbo bi u EU dobili globu…Ivici je njegov poznati klijent posla fotku sa kopiranon etiketeon samo ča to nije vino iz Kaštila…malo san vas ispila sa ovin ali san mora napisat jerbo je žalosno da se ovake stvari događaju…
Uf bilo je i govora o otvaranju Ivičinog maloga muzeja u Trogiru di bi bili izloženi trudi težaka i ribara i usput kušavanje i prodaja vina od Ivice Milana…o tome više kad projekt zaživi…potražnja za njegovin Pošipom je tako velika da Ivica & sinovi namjerava pripremit još jedan vinograd sa Pošipom koji bi bija tako koncipiran da svo znanje i praksa sa postoječega vinograda bude utkana u novi projekt…
Iako Ivica Milan ne proizvodi Crjenak Kaštelanski vrlo rado je ispod odrine na zidu dao i svoj doprinos kolegama koji polako od Crjenka stvaraju brand Kaštila…ima tu okolo Crjenka puno posla ali su na pravome putu…
I na kraju prišapnija mi je na uvo da se njegov Pošip pijucka i u palači Windsor ima cilu korespodenciju o temu ali nesmin ništa napisat oli fotkat ha, ha…čakulali smo o još puno lipi stvari o vinu spizi trudima guštima…svitu moj sve znate Ivica Milan je kruv od čovika samo tako daje naprid nima fermavanja…
balancana 
Komentiraj