Upoznao sam mnoge vlasnike restorana pogotovo u Niskozemskoj a bome i u drugin zemjama EU…svak jema svoju štoriju…meni je jedna od najdraži gastro štorija kad se ono započme kuvat uz mater pa se onda napravi veliki iskorak i osamostali otvaranjem šesne kvartovske pizzerije u stambenoj četvrti koja sa dodatnim experimentima postaje malo drugovačija puno boja od drugi lipo misto di te gosti štuju i cijene tvoje gastro izazove…sve je to lipo do momenta dok ne dođe vrime da se triba pogledat u zrcalo i reč…gremo sad na višu gastro skalinu novu malo izazovnu…eto isprid zrcala su Sandra i Dane…odluka je pala iz stambene četvrti se spuščaju do mora di je One million $ vieuw na more, škoje, brode, picigin, domači svit, furešte di je u blizini centar Metropole Jadrana čarobni Split e tu se na kultnim Bačama jema malo više od tri miseca priselila ekipa restorana Zora Bila...prvo ča mi se dopalo je raskošno prirodno svitlo u restoranu sa fenomenalnim panoramskim pogledom na škoje i Bače…da upotribin oni poznati kliše…svitu moj vo je definitivno dobitak za grad Split…
Naš kasno popodnevni obid smo započeli sa kušanjem rose-a od jednog od pionira Hvarskog vinarstva Antuna Plančića…nismo se odavna vidili pa je pala čakula dakako o vinima a eto jušto istu večer je vinarija Plančić jemala u restoranu Zora Bila sjubjivanje njiovi vina sa delicijama od Sandre i Dane…
Ka san spomenija Sandru i Danu bija bi red da se i par rići napiše i o njiovoj princezi Mii…koliko san moga vidit Mia je alfa i omega u posluzi ma vidi se odma da je dite od rasni ugostiteja, bravo Mia moja priporuka je aj malo po svitu misec dan ovod, misec dan onod, po dobrin restoranima usavršaji se jerbo je vo tek početak jedne lipe obitejske gastro štorije mater i otac su mekli fundamente a tebi sa njima nek je sa srićon…mukotrpan je put do vrhunskoga restorana ali tvoji roditeji i ti morete napravit gastro čuda…nemoj mi zamirit da te guran u posal ali san onako iz prikrajka peška da jemaš mota i to bi po meni tribala usavršit…
Malo smo sa Danom čakulali o idejama, novitadama, gastro izazovima kako, ča i kad ali neču ništa špijavat znan puno ali van nesmin reč…ka dođe vrime onda če Sandra Dane i Mia otkrit svoje gastro adute na dobrobit svih gostiju koji vole fine gastro užitke i onu pravu atmosferu koja je svima draga ka izađeš vanka i vratiš se doma priko zadovojan…
Započeli smo sa Tajlandskom juvon od pomidora sa pinkicu kokosa i đumbira prava pikantna krasotica…drago mi je da se mogu kušat i za nas egzotična jela…na karti san vidija Japansku ramen juvu to je sad veliki hit u Amsterdamu ramen juve od piletine, puretine, ribe i vega bravo za to triba svega pomalo kušat svit je posta globalno selo…ali je ipak važan naglasak na osobnost restorana i domače ponude vina a tu se u Zore Bile postigla ravnoteža…
Ja san gušta u domačoj talijateli neri sa škojkama, račičima, krakovima hobe i par raki uz reducirani brujet koji je bomba, osobno ga još više reduciran da ga mogu rizat na bokuniče, ma ovi je bija taman toliko tekuč da se manistra more slasno “šporkat”.
Ona je guštala u tri mini burgera od entrecote bija je pinkicu veči zalogaj nima veze i ja san kuša jedan bokunič…meso vrhunsko pecivo ostaje suvo brez da se ostaci krvi cide ma tako i triba…
Panecota da roza a sa strane coulie od malina, čikolata…kaže mi Ona da je bilo ajme…
Ja san gušta u kolaču od karote sa bilon čikolaton tajanstveni zamagljeni pjat divota za nepce i oko…
Pijuckala su se Petračeva Karizma 2015e i Malvazija Montiron Medea 2016e…priko lipo i pitko isto ka i spiza koja je jestiva…ha ha…dosta mi je bilo slikovnica koje su samo jednin dilom jestive triba kuvat u temu je cila filozofija…
Imali smo zadovojstvo da smo jušto kod našeg dolaska sili za stol sa Antunom Plančićem velikin Meštrom od Hvarskih vina zajedno smo kušali njegov rose od 100% Plavca maloga…divota bravo… svitu moj nova etiketa sa rednin brojen boce a i točna količina vina iz godine berbe sve to daje posebni timbar boljoj informiranosti da konzument zna koje vino i koliko ga je proizvedeno bravo…
Istu večer je bila poznata Hedo Srijeda di su se delicije restorana Zora Bila sjubjivala sa Plančićevin Hvarskim krasotama…
Bravo naši judi gremo daje u nove eno – gastro izazove bilo nan je priko lipo…
balancana 