U zanje vrime se je u gradu Splitu puno tega u gastronomiji i štovanju vina prominilo. Otvorene se nove betule i vinski barovi, raznorazne vinske radionice i slične manifestacije a cili Get je pretvoren u restoran na otvorenome. Ovaki tempo razvoja takega posla nedovojno prati školovanje potrebitega personala.
Restorani se snalaze kako znaju, iz skule izlazi puno manje školovani kamarijera, kuvara i somelijera vengo je potražnja. Restorani zapošjavaju studenate oli mladi poletne jude iz drugih dilova naše nan Domovine.
Ova ekipa sastavjena od jubiteja vina i znalaca te materije je započela edukacijski ciklus za restorane, oštarije i ostale betule da bi za svoje poslužno osobje dobilo osnovna znanja o serviranju, sjubjivanju i primarnome znanju o vinima.
Nije to lak posal osobno znan da je nivo posluge u restoranima na vrlo niskome nivou ma vlasnici bi tribali investirat u radni potencijal jerbo sa tin stvaraju i sebi mogučnost večega prometa jerbo znanje i primjena tega znanja generiraju veči promet. Konzument je voljan platit i veču cinu ako vidi da iza cile štorije stoji znanje i ozbijnost.
Ove večeri u atriju Graskoga Muzeja je bila puno lipa večer eto u informalnoj atmosferi se daju osnovne informacije i nakon tega je ugodno druženje. Osobno bi par stvari nadoda pošto je to cilovečernje događanje nebi bilo zgorega da se na katrige i banke meknu šesni kušini da gostima bude pinkicu ugodnije. A i zalogajčići bi tribali bit maštoviti i posebni. Ajde to je meni važno jerbo je to profesionalna deformacija. Ma na stole extra meknit samo par pijadela sa domačin kruvon i sa par pijadela maslineva uja bi bilo dovojno. Sve u svemu fala vridna inicijativa.
O Krolinin vinima je puno tega pisano ali vaja napomenit da su ova vina sa najsjevernijega dila Dalmacije i jedna o ritkih vinograda u Dalmaciji di vinogradar na promaliće triba vodit računa o jutarnjeme mrazu u vinogradu i na vrime zapalit lomače da bi se spasija vinograd. Nadaje triba napomenit da je zrijanje grozja na tin položajima i rizik pošto je kasna berba a lito je na izmaku a ipak nepredvidiva jesen je tu prid nama.
Dražan Krolo je vrsni vinogradar i vinar koji je iz kamena i škrte Dalmatinske zemje uspija napravit par krasnih vina, meni je veliko iznenađenje njegov Crljenak kojega je tako kvalitetno spravija da je posta pravi unicum.
Ali njegovat Crljenak nije baš ni lako jerbo na tin položajima u vrime prid jematvu more jedna obilata kiša sve uništit pošto bobice nabubre a kožica Crljenka je nježna i eto ti botritisa a s tin puno belaja. Inšoma, ka se zna da obitej malega Plavca voli pogled na more a iz Strmendolca ga nima ni za lik onda je to još dodatni konpliment vinariji Krolo na njegoveme Crljenku. Sa nestrpljenjem čekan sadnju i razvitak novega vinograda di če bi posađeno ako se ne varan trideset ijada trsa…
Eto sve u svemu vrlo ugodna večer a ekipi Siniši Koceiću i Alenu Gulanu želin još puno ovaki vinski srida.
balancana 