Nova butiga o’bibita i spize u Splitu. U palači Dešković na dno Rive pokraj naše Prokurative i kultnog otela Bellevue je ima par dan otvoren vrhunsko dizajnirani pub Fabrique. Sa ovin pub-0m je Split dobija još jedno priko lipo misto di se more čagod lipega klopat i guštat u izboru krasnih točenih piva.
Proša san cili svit i bija u puno butiga ali Fabrique se more smistit u mnoge razvikane metropole ovega svita. Prvo ča mi je upalo u oko su monture kamarijera ma eto finalmente da se niko sitija da se kamarijari od glave do pete vrlo šesno obuču ma čak su in svima i tenisice iste,…bravo.
Vanka je sasvin solidna teraca jedino ča meni osobno bode oći su parkirani auti ali to je jedna druga Spliska štorija.
Splitska obala malo pomalo dobija jednu gastro šetnicu. Od Sustipana priko Zapadne obale pa Matejuške, Šperuna, Rive, Prokurativa, Geta pa do Bača, Firula i Zente se more na puno mista guštat i kvalitetno sprovest. Ovo je tek početak gastro razvitka Splita na još više mista se planiraju novi restorani oteli i betule. Ali nan falidu tipične Dalmatinske betule, ma sva srića da se uskoro očekuje otvorenje i Konobe u Sinovčića kali odma iza Fabrique ali o temu ču pisat ka sve bude na svome mistu.
Jedina ča bi u Splitu tribalo a to je da se napravi određena kategorizacija po vrstama gasto ponude svih tih butiga jerbo konzument koji put nima pojma di je uča i ča se more pojist. Nadam se če se par kolega blogera i gastro kritičara sa menon složit i dogovorit pa da bar mi napravimo ajmo reč jednu vrstu užance po kojoj bi se gosti a i ugostiteji mogli ravnat.
Mi smo guštali Ona je vazela burger a ja san klopa ribicu u košuji sa friton bilo je ukusno i šesno posluženo. Posluga je uigrana i pari ka da je butiga već dugo vrimena otvorena. A bome san vidija i par poznati Spliski faca eto nadam se da če te face nastavit dolazit po Spliskin oštarijma ugostitejima tribaju taki da ostave šolde u našem Gradu. Nije sve u fureštima.
Fabriqe želin puno šušura i dobar promet.
balancana 