Naš dil Raja na zemji…južna banda škoja…

Malo pomalo sva dolazi na svoje misto. Taman par dana prije vijađa po EU san posadija agrume na našeme Raju na škoju. Tako da če in ove kiše dobro doč da razviju korjenje. Masline su se lipo primile tako da sad jemamo dvadeset cabala.

Nakon sadnje lavande doša je red i za agrume onda ovako redon dvi mandarine rana i kasna sorta. Pa dvi aranče Wašingtonke jedan limun sa tankon koron i jedan kumquat.

Doma jeman još dvadesetak sadnica lavande, desetak sadnica ružmarina a pripremija san i još desetak sadnica visečega ružmarina. Viseči ružmarin ču posadit na suhozide i poviše bovana.

Čeka me još i prisađivanje kaktusa i agava tako da če i oni bit prisađeni svoje novo misto.

Za tri nešpule triban još iskopat rupe tako i mirita uz more triban jamat puno zimzelenog voča. Evo je i češnjak lipo proklija jema bit da mu ova klima odgovara ako bude sve kako bi ja tija onda ču ga dogodine još više posadit.

Još samo mendula i dvi smokve i to bi bilo sve. A i prva šparoga je ubrana i po tradiciji ona se ji sirova.

Mašograd…pogled prima moru…

Evo me jopet na Gojači kultnoj plaži Mašograda…sve lipota Dalmacije je ovod…zanji put san postavija litrate sa lungomara na Gojači sa lipin vrtlima i ladovinon od cabala…puno lipo…a sa san se okrenija prima moru…ma ovod nisu potribne rići nek litrati ispričaju svoju štoriju…

Kaštel Sućurac…alias Mašograd…

Šesno misto sa puno povjesnih znamenitosti. Ovod je vrime ka malo stalo a ča se mene tiče nek ostano ovako još niko vrime…ma nije da san protiv razvoja ali baš ovaka mista koja nisu pokvarena utrkon za lovon i komercijon e ta mista jemaju šansu da se kvalitetno razviju. Harmonija lavure, ugodnog stanovanja i turizma je njegova budučnost. Nemoj mo se zavaravat moderni turisti traže ovaka mista di je o uvik mir i di je udil litnji furešta naspram domačega svita u pravoj harmoniji a ka kažen furešta onda mislin na turiste a svi ostali furešti ako se oče priselit u Mašograd su više vengo dobrodošli. Kvaliteta života je u raznolikosti i sa dužnin uvažavanjem postoječi užanci a te se užance mogu sačuvat pametnon lokalnon politikon i dugoročnin razvojem. Nama je Mašograd po miri i tili bi da tako i ostane. Evo van svitu moj ovod malo litrati da se vidi sva lipota ovega šesnega mista.

…vinoteka i galerija u Sukošanu…Domagoj Rogoznica je domačin, bravo…

Postala nan je tradicija ka gremo prima Zadru da kavicu popijemo svaki put u niko drugo misto pa da ja onda napravin par litrati tek toliko da se dobije utisak u kakvo smo misto došli.

Danas smo stali u Sukošanu, ma da van pravo rečen znan ga samo po onoj velebnoj marini i sa onin kičavin restoranima i apartmanima uz cestu. Nismo van mi od tega đira mi više volimo starovinski tinbar…zato smo skrenili doli prima mistu eto računan di je crikva tu bi mogle bi i stare kuće.

I nismo se privarili, ajme kakvi doli kraj mora jema lipotica…samo je ščeta da su mnoge tako zapuštene i da se deboto urušavaju. Jema bit da su ka i svudi problemi sa nasljedstvom pa se ne mogu dogovorit.

Ka smo došli do rive odma nan je u oko upala jedna šesna stara kuća malo žučkaste pastelne boje. Dok smo se Ona i ja divili toj lipoj kući eto u isto vrime se potrefi jedan čovik i ja ga pitan…šjor jema li dikod koji kafić za popit kavu i usput rečen kako je Sukošan šestan i da je ova žuta kuća prilipa a on nan reče to je moja ajmo ka van tako draga malo povirit unutra.

Iza vrata livo je šesna vinoteka di se prodaju vina iz zaleđa Sukošana a također i maslinovo uje. Na desnu bandu je mala galerija ovega puno finega čovika koji je umjetnik i pravi krasne suvenire na podlozi od ostataka bačava i karatila ma divota za vidit,…puno šesno. Oni nosači za vino na staroj kupi kanalici su stvarno krasni suveniri.

Ove dvi foteje koje je napravija od stare bačve su za njegovu nevistu Doris pravu krasotu od glumice iz kultne serije Larin izbor i njezinega muža Borisa Rogoznicu…a šjor Domagoj Rogoznica je puno ponosan na nji dvoje.

Liti je ovod lipi šušur navratidu jubiteju umjetnosti i dobrega vina a ovake šesne buže bi tribale bit po cilon našoj obali bravo šjor Domagoj bilo nan je ugodno u vašeme društvu.