Arhiva za Srpanj, 2013

Novitade iz Kaštela…kamena kuća “Kala”…

Posted in gastro gušti i ladanje u dalmaciji... on Srpanj 26, 2013 by balancana

Evo san nastavija sa restauriranjem naše kamene kuće…meštar je pod budnon paskon mene osobno meka keramiku u kužini, banju i na tlevu od kužine…sa če bit mala pauza jerbo su nan ovod dica i unuci tako da se gušta u litnjin čarima Dalmacije ali u kolovozu nastavjan sa lavuron…ma ovo če bit bonbončić od kamene kućice…

IMG_0095 IMG_0097 IMG_0099 IMG_0100 IMG_0101 IMG_0102 IMG_0104 IMG_0105 IMG_0110 IMG_0112 IMG_0113 IMG_0116-001 IMG_0118-001 IMG_0121

Oglasi

Kaštela…Dalmatian slow life…

Posted in gastro gušti i ladanje u dalmaciji... on Srpanj 12, 2013 by balancana

Sidimo Ona i ja na teraci u Kaštel Starome…pijuckamo pivo i guštamo a dvoje stariji judi su sa rive bacili tunju i trude se da uvate koju ribu…mlade matere sa dicon guraju kolica…mularija je na bičikletama…penšjunati điraju pomalo s noge na nogu…na šentadama je živuči Facebook oli ti naše domače žene koje sve znaju i sve komentiraju…

Dva Švedska para sidu kraj nas na terci i troše Ožujsko samo tako…a di neče pogled je nezaboravan, pivo je deboto mukte, nima falšega šušura i sve je leđero taman po miri gosta i za pravo opuštanje…a drugi furešti điraju rivon i pogled in je večinom prima moru…

U daljini se na punti  Marjana vidi ogromni kruzer , na po zaljeva je jahta nikoga bogatuna a na Poljudu je počeja Ultra Europa music party…

IMG_6018 IMG_6022 IMG_6024 IMG_6026 IMG_6027 IMG_6028 IMG_6030 IMG_6031 IMG_6034 IMG_6035 IMG_6037 IMG_6042 IMG_6046 IMG_6050

Sunce pomalo zalazi evo još par fotki prima obelisku sa konjanikom na vrju ma lipo da ne more bit lipše. Samo još da litran ove tamarise i kapare i onda gremo doma…

Litnji gušti…dalmatian slow life….

Posted in gastro gušti i ladanje u dalmaciji... on Srpanj 6, 2013 by balancana

IMG_5460IMG_5458

Lito je u punome zamahu i furešta je na moru ka u prići a mi koji smo na kopnu lagano slažemo suhozide, bacimo čagod na gradela, točajemo se i onako sa malo fjake provodimo penšjunatska dane.

Evo san i škaline za u more postavija tako da se moremo okupat i po meštralu, jerbo su ove sike oštre ka nož.

IMG_5462

Dok Ona spravja kavicu i čagod za obid dotle san ja stalno u nikome posliču, malo lavure, malo odmora, malo banjanja.

Kad prođe lito onda triban počet kopat rupe za sadnju čempresa nabavija san i sedan komada a i mandarine, limuni, aranče su u pripremi.

IMG_0686 IMG_2632 IMG_2966 IMG_2994 IMG_3107 IMG_3378 IMG_5159-001 IMG_5162 IMG_5453 IMG_5456 IMG_5516 IMG_5526 IMG_5536 IMG_5542 IMG_5544

Restoran Toni…Tisno…

Posted in gastro gušti i ladanje u dalmaciji... on Srpanj 2, 2013 by balancana

Za sve moje gastro i hedonističke prijateje prvo jedna napomena. Vozili se vi iz pravca Zadra oli Splita oli se sa Dalmatine spuščali prima Murtera a i ako dođete brodon e onda je za poist čagod lipega, šesnega i ukusnege vaše pravo misto restoran “Toni” u Tisnome…ma odma kad arivate triba naručit cvit od hobotnice sa cviton od kruva i cviton od ugorove paštete.

Uvik san volija oštarije di jemaju ništo specijalnega i po mome guštu…tako da van ja o’gušta sidnen za stol pa odma rečen kamarijeru da mi to specijalno jelo kogo spravi i usput nek mi priporuči jednu botiju vina.

A tako je bilo i u restoranu “Toni” i evo ča san jia…hobotnica tanko rizana je ležela na posteji od rucole sa malo kapara i na sitno paprike…priko svega ukusni priliv od otočkega uja i još finije kvasine…i na kraju tanke latica krasnega odležanega sira, ma divota, kruv je posebna štorija peku ga u svojoj kužini a serviran na stolu pari mi ka cvit o’kruva naše lipe Dalmacije, ma lipota za vidit a pogotovo za pojist tako da na kraju nisan odolija da sa kruvon ne pošpugan ono malo uja i kvasine…

Paštetu od ugora san maza na kruv i onda sa malo hobotnice zajedno o’gušta jia…svitu moj otvara mi se novi svit…uostalome ne morate vi meni virovat jerbo san van ja malo čudan ali san siguran da je još puno ovaki čudaka i zato želin s njima podilit ovo moje gastro iskustvo…a na vama je da navratita u puno lipo misto Tisno…

Vinska karta je samo taka od Tomićeva Plavca priko Korte Katarine do Bibicha…Krauthakera i Kabola i još više puno lipi vina…

Toni bilo nan je lipo i vidimo se drugi put a gastro lutalicama priporučujen navratite u Tisno to je puno lipo misto za guštanje.

A restoran “Toni” je lako nač…tribate skrenit na rotoru Jadranske Magistrale u pravcu Murtera pa onda nakon nikoliko kilometri dođete u Tisno vozite priko mosta pa onda na desno i nakon sto metri je na livu bandu restoran “Toni”…a parkinga je dovojno u blizini…

…da ne zaboravin još napisat tišnjanski “Garden festival” je  jedna izvrsna manifestacija koja če Tisnome donit ne smo šolde vengo i veliku besplatnu reklamu…veliki bravo za Tisno…

IMG_5187 IMG_5188

IMG_5189-001 IMG_5193 IMG_5195 IMG_5209 IMG_5210 IMG_5215 IMG_5219 IMG_5224-001 IMG_5230