Mašo me toga tare…Ljiljana Crnić…

Jema temu jedno po godine oli više, ne sičan se više, ka san na jednome Kaštelanskome internet portalu vidija da je u Vitturiju promocija poezije gospoje Ljiljane Crnić…

Moran van odma priznat da više volin bibite i spizu a poezija mi je ostala samo ka ugodan dil moga mladenaštva…život je krenija drugon bandon i upa san u “real life”…ali eto na temu portalu vidin da je na naslovnici libra i naša kamena kuća u Mašogradu…ajde nije cila…ma vidu se samo vrata o’konobe i to bokunić ali mi je kako to Sućurani kažu mašo drago da je na naslovnici…normalno je da san reagira i da san gospoji Crnić čestita na promociji libra poezije i zafalija se da je mekla fotku naše kuće na naslovnicu…

Gospoja Crnić je ka prava fina gospoja na to reagirala i rekla poslat ču van jedan libar pa malo guštajte i ako van se bar jedna svidi meni če bit velo zadovojstvo da je ti libar doša u vaše ruke…svitu moj evo ga…libar je iz Beograda stiga pa koji put pridvečer siden i pročitan par stranica…meni je ova KAVICA puno draga i nju san izbra da je meknen na moj blog e pa gospojo Crnić fala van na poeziji i mogu van reč da san gušta čitat…a za vas su ove fotke romantičnoga Mašograda…lik su za dušu i nostalgiju… 

 

.

 

pozdrav iz Mašograda…

Nova Riva u Splitu…

Eto smo i ovo doživili da se sagradi i nova Riva…ma neču ovod pisat o prišnijin stvarima koje su potribne oveme gradu nek se time bave političari…ja ču malo o Novoj Rivi…

Ka prvo je velika je ščeta da se nije oni bokunić produžija kod ex Ambasador otela do Matejuške tako da bi se Stara Riva spojila sa Novon Rivon ali eto to su naša posla valjda če niki novi Gradonačelnik se uvatit tega…meni je samo žaj da su tamo samo kafići…tribalo je tu meknit i par restorana a ta tri kafića mi je malo mršavo ali eto kako je tako je…da je bilo pameti onda bi se odma napravilo jedno 6 do 7 objekata di bi se vrtila lova a Grad bi jema solidna primanja.

Grad Split bi napravija veliki iskorak prima mondenom vrhunskome turizmu…pogotovo kad bi se na Zvončacu napravila podzemna garaža sve bi živnilo jerbo triba ovod reč taki pogled na Split i luku nima niko a to je tribalo puno boje unovčit…vodit Grad je ka da se vodi velika komercijalna firma triba da se lova obrče, samo tako se moge finacirat druge potriba Grada…mišjenja san da bi to bi postala puno dinamičnija Riva ovako mi se pari da je po apo uređeno, ali dobro, kako je tako je,… ipak je cili ugođaj OK…

Dalmatian slow life…

Kod nas se sve vrti oko spize i vina…litnja kužina je jedno sedan i po miseci u funkciji a to nan daje dodatnu inspiraciju za spravjanje spize…

Vanka kuvat je posebna fibra jerbo sve gre u prvoj brzini  a u okruženju smo cvića i zelenila sa malo diskretne  mužike…verdure i vina su na dohvat ruke tako da nije problem sapravjat nova jela…

Tu i tamo nan dođu prijateji i onda je još veči gušt a pogotovo kad je liti cila fameja sa pustin unucima e onda je prava fešta od jiča i piča,…iako se moramo prilagođavat dici ali nima veze i oni se od malena pomalo učidu pravoj spizi…ča se nas tiče lito more počet…

Srida je dan za mater…

Srida nan je dan kad gremo kod matere u Split…mi napravimo đir po Gradu do peškarije pa priko pazara kroz Radunicu doma…ali se prvo obavezno na Pjaci popija kavica…mater je ušla u 90u i triba jon pomoč okolo nje i u stanu…sestra mi je 6 dana u šetimani a mi sridon…skuva jon se obid, malo se pospremi po kući baci se čakula a često ponesen laptop da vidi fotke…vaja vidit kako nan je doma i da vidi friške fotke od unuka i praunuka…

Eto tako dobije bar niku sliku kako je u fameji…jebiga nije lako bit star i sam…ali nek dura dok dura tako je mater izabrala oče do kraja bit u svojeme stanu…

Danas smo jon spravili mola lešo sa malo špinjače…a voli ona razvodnit i malo vina sa sokon od jabuke i nadolit vode tek toliko da more boje spavat…a i poradi cirkulacije bar tako ona reće smijuči se…ma neka gušta…

Mašograd i njegove tajne…

U Mašogradu a to van je Sućurac za one koji to ne znaju je u kali Don Ivana Čuline živila fameja Sokol…e sad čete se vi pitat kako to je znan ka san furešti u Mašogradu.  Eee, štorija van je ovaka,…jema temu nikoliko godina u ovoj sad renoviranoj kući sa plavin škurama i puno lipin vanjskin fumaron koja je u u našoj kali je pa krov po sa sobon odnija na tle dva tri tavana,…bila je to kažu susidi taka buka parilo je kao da je pala bonba…sva srića niko se nije ruvinja jerbo je kuća bila prazna. Docnije je to Grad Kaštela sve restaurira tako da je ta kuća postala prava lipotica, koliko san čuja gospoja Antica Sokol je bila zanja koja je tu živila i jema bit da nima više nikoga na životu od te fameje Sokol.

E sad kakve veze jema to sa ovon štorijon,…ma jedan moj susid mi je doša sa jedanon velon kuverton i reka…suside, ti se ono ka muvaš po internetu ajde moga bi ovo meknit na internet. Doduše susid je jema niku drugu ideju sa interneton i sa ton kuverton o temu neču pisat zato ga nisan obadava za njegovu ideju i evo san van pripremija ovu štoriju.

U toj kuverti je bila jedna stara crtanka za dicu a kojon je lipin slovima bilo napisano Antica Sokol i na prvoj stranici unutra je samo jedan njezin crtež Sućuračkega kaštela i to je sve.

Ka su one puste škovace i razbijene grede i kupe iznosili vanka u kontejner susid je vidija tu crtanku i iz kontejnera je vazeja i odnija doma. Dok je nije meni pozajmija da je slikan i meknen na internet.

Eto prošli su Dalmacijon kraljevi, okupatori, partizani, saveznici, doživotni prešidente, novi prešidente, pa još jedan, pa još jedan a i sad je još jedan…život je proša kuća je ostala u njoj nima života ali je ostala crtanka gospoje Antice Sokol.

Volija bi da se ovod ispod javidu Sućurani koji malo više znaju o toj kući i gospoji Antici Sokol zaslužila je da je se sitimo.

Ostavite koji komentar da i drugi svit malo boje upozna tajne našega lipoga Mašograda

restoran Kadena…Split…

Dok se u Istri, Zagrebu, na Hvaru, Cavtatu, Dubrovniku i na još par mista more uživat u gastronomiji u največem gradu Dalmacije Splitu je jad i bijeda…

Da nije restorana Kadena di glavnu rić u kužini jema Meštar od kužine Braco Sanjin nebi se moglo u Splitu nidi visoko kvalitetno jist…znan da če se javit dežurni komentatori i reć,…aj pođi tamo oli vamo…ipak san mišljenja da je sve to luk i voda…u Kadeni je glavna rić Bracina spiza i somelijer Damir…usluga je po meni previše amikalna, ajde  možda san preosjetljiv jerbo san bija dil Bečke skule ali ipak usluga bi tribala pratit kvalitetu spize i vina…sama koncepcija restorana je taka da izgledom zahtjeva da usluga bude na visokome diskretnome nivou…ali mogu virovat da gostima Kadene godi amikalni pristup i onda je to sasvim OK…

Eto sve ča smo jili nan je lipo leglo i opravdava visoki rejting kojega restoran Kadena jema pri izboru najbojih restorana Hrvatske…evo van fotke pa prosudite…