Arhiva za Studeni, 2012

Pogled sa sjeverozapada prima jugoistoku…prima Dalmaciji…i Kaštelima…

Posted in gastro gušti i ladanje u dalmaciji... on 9 studenoga, 2012 by Dalmacija moja inspiracija

Sa ka smo u Amsterdamu odma me uvatila nostalgija prima Dalmaciji…ajde nije baš sve crno malo se šalin…ma ovod nan je po miri dica, unuci, stari prijateji, fameja, poznate ulice, konali i muzeji…ma često smo mi ovod tako da mi se parilo ka da nikad nisan saša doli , a doli to van je di je sunce oli di je more da se razumimo more Jadransko…evo van malo nostalgični fotki iz Kaštela i iz Radunice…tek toliko da se zna di je lipota jednostavnega života brez stresa ali i brez perspektive…ali to je več jedna druga politička štorija…

Ovaj vrtuljak zahtijeva JavaScript

Poili smo ostatke iz frižidera i onda spavanje…čeka nas let za Amsterdam…

Posted in gastro gušti i ladanje u dalmaciji... on 7 studenoga, 2012 by Dalmacija moja inspiracija

Masline smo sredili a okolo kuče san puno tega pospremija samo me još čeka rizanje grančica i lišča od maslina…a to ču ka se vratimo. Dok se u Dalmaciji judi još kupaju ovod u Amsterdamu je oblačno i deset je gradi ali je zato puno tepline sa unucima tako da nas nije briga za vrime. Ona je pokupila sve ča je jemala doma i napravila obid a ja san ubra još jednu papriku u vrtlu koju je Ona pofrigala dok za vino nima problema. Crvena makinja je pokrivena a cviće san meka u zimski vrtal. U Jamerike je Obama ponovo pobjedio i bar ča se mene tiče pobjedila je pamet kod Amera…ali nećemo ovod o temu moja butiga je zatvorena za politiku. Uskoro ču ovod meknit i novitade iz Amsterdama a biče i spize…

A za unuke smo ponili ove šesne maice sa Trogirom u srcu…

Ovaj vrtuljak zahtijeva JavaScript

zapečene masline…

Posted in gastro gušti i ladanje u dalmaciji... on 5 studenoga, 2012 by Dalmacija moja inspiracija

Uje je napravjeno i uvatili smo jušto 25 litri eno ga sad miruje pa čemo ga nakon misec dana pritočit…a od one fece oli van taloga ču pripravit jednu lipu ricetu možda ispečen kruv vidit ču još…na cablima san ostavija lipe vele jubičaste masline i sad san i zapeka u pečnici i meka u caklenke…za laganini guštanje do slijedeče berbe…

Onda ovako masline san opra i osušija…meka san masline u škrovadu i tu škrovadu u zagrijanu pečnicu na 150 gradi peč jedno dvadeset minuta…i onda san i ostavija da se oladu…u čiste caklenke san doda desetak šipurika, dva lista limuna, par lističa kaduje, malo češnjaka i nikoliko grančica od cvitova koromača…pa dodajen red maslina koje onda posolin sa krupnon soli i tako redon dok sve ne bude potrošeno…na kraju jedna obilata žlica maslinova uja u svaku caklenku, sve dobro promišan i pritresen i to van je to…eno doli su u konobi u maškaduru

Ovaj vrtuljak zahtijeva JavaScript

 

 

dalmatinski gušti…i norveški carpaccio od soba…

Posted in gastro gušti i ladanje u dalmaciji... on 4 studenoga, 2012 by Dalmacija moja inspiracija

Mnogi posjetiteji su kod mene na blogu i drago in je da pišen o Dalmaciji…neki živu ovod a neki su daleko, jedna od mojih vjernih posjetiteja bloga je i Vera iz Norveške…ona sve pročita, pa priko facebook-a ostavi komentar, gušta i jednega dana odluči da mi pošaje poklon…i tako pošton stigne vakumirani paketič u kojeme je carpaccio od soba…lipa beštija koja me uvik podsječa na Dida Mraza ka bi u prosincu dilija poklone za dicu…evo san odlučija da napravin mali lunch za nas dvoje, iša san iza kuće i ubra svega ča mi se potrefilo…cvitove od zanje balancene i paprike, pa cvitove od ruzmarina i mažurana, par listova od kaduje i murtele…našla se u vrtlu  i zalutala paprika a u dubokome san jema i cvitova od tikvice i nji san pofriga…mlada kapula je na sitno…rukola reste u zimskem vrtlu…i mlada je…šipak je bija na grani a domača kvasina i maslinovu uje je pri ruci…sve san onako od oka dekorira i uz bocu našega rose-a smo se mi dvoje lipo pogostili…evo van fotke a Veri veliki bačo i fala na oveme vrlo ukusneme poklonu…

Ovaj vrtuljak zahtijeva JavaScript

naša konoba…

Posted in gastro gušti i ladanje u dalmaciji... on 2 studenoga, 2012 by Dalmacija moja inspiracija

Iza kuća dva ipo metra po zemjon je naša konoba…sa ka je malo zaladilo počimaju lipa vrimana guštanja…uvik se doli nađe čagod posla, ako ništa onda se barenko more pročitat koji libar o’vina oli popit žmul vina…a i sa prijatejima se doli nađemo popijemo aperitiv, pročakulamo i prvi slijed doli pojidemo…život triba znat organizirat, ma ne tribaju veli šoldi samo voja i dobre ideje a sve ostalo dolazi samo od sebe…uskoro me čeka i pritakanje vina  ali o temu drugi put…

 

Ovaj vrtuljak zahtijeva JavaScript