kruškice od kapara…

svi znamo za kapare  lipi šesni pupojci koji se prije otvaranja uberu i meknu u kvasinu…al jema još jedna delicija a to van je ajmo je nazvat kruškica od kapara…kad cvit kapara procvita i ka se osuši e onda počima da reste jedna kruškica puna simena a bome i mesa…

evo van ricete  kruškice operen dodan cvitova od koromača malo ružmarina par listi lovora i kaduje…i nakraju par lističa češnjaka u vrilu vodu ubacin kruškice i nek se kuvaju jedno tri minute…dalmatinske začinsko bilje ubacin u vrilu vodu pa nakon par minuta sve izvadin vanka i rasporedin po čistin caklenkama…nadolijen sa vinskon kvasinon dodan malo krupne soli  i to van je to…

 

 

 

nakom 15 godin je ovo bilo vino pritočeno…

Ma jema jedno tri godine da mi je jedan  moj amiko, ma nesmin mu odat ime istriskat če me, da 16 boca vina jerbo mu se parilo da vino nije dobro i da od tega vina napravin kvasinu…kažen ajde dobro, ja san to meka u kantun konobe i zaboravija. Ma danas se sitin eto moga bi oni 16 boca onega vina od amika da sredin za kvasinu…prije nego se uvatin lavure malo san ga kuša a ka tamo vino je samo tako, je da je ostarilo,  je, je staro je, ali je lipo pitko i boje reć ludilo od vina…e sad se plan prominija prvo san ga procidija kroz jedan tufer i cidajku i sve meka u rostvrajku od 100 litri pa čemo ga točit pod kanelu…prvon prilikon se organizira degustacija i onda ču ga amiku ponudit…a od njega san čuja da je spravjeno od plavca malega sa vinograda blizu Jelse i tija je napravit rose ali jema bit da nije sve išlo kako je naumija tako da je ovo ispalo čisto bilo vino…ma koje san probleme jema za idavit čepe stalno su pucali napola ali eto lavura je gotova i sad nek malo odane i do par šetimana je spremen za degustaciju…

 

Ovaj vrtuljak zahtijeva JavaScript

lavuranje u kamenoj kućici…

Sad kad je letrika postavjena došlo je vrime za kanalizaciju i vodu, meštar je bija i uskoro počima radit…ja san sa ovin malin kmpresorom ispuva fuge na šufitu i počiman i fugirat…raspita san se za kamenu radnu ploču u kužini kako sad stoji bit če od ovega dolita a isto tako i ploče na zidovima iza kuhinjski aparata od dolita…betonski lavel je stiga i tribamo ga dobro namazat i zaštitit, eto sve gre po planu…nosači za grede se vare i pituraju uskoro je montaža isto tako i metalna konstrukcija koja če bit ispod greda u dnevnoj sobi a poviše te konstrukcije na šufitu če bit banj…to je za sad a sutra je nova radna pobjeda…

 

Ovaj vrtuljak zahtijeva JavaScript

još uvik kuvamo i guštamo u litnjoj kužini…

Evo je kalendarsko lito finilo, dolazidu nan vrimena od kiša sa dikod malo bure, vrime pravjenja vina i pospremanja vrtla…a do misec dana i branje maslina…ove zanje kiše su došle u pravo vrime masline su se oporavile i sad vaja čekat i vidit kakvi če randman da bude…uostalome nije me ni briga mi svake godine jemamo dosta za nas i za poklonit koji kil uja…dolaskon jeseni prominija se i režim guštanja…za doručak smo sad isprid kuće a za obid još uvik u litnjoj kužini ali oko šeste ure je gotovo i onda se gre u kuću…Ona je još uvik optimista i neda mi da vodu iz plave bare ispunpan, nada se da če se još koji put točat…nima veze je da je sunce još jako ali nima force da ugrije vodu…sutra gren u našu kamenu kućicu malo lavuravat a u nediju me čeka pritakanje vina i turnjanje mošta…ali o temu ču pisat uskoro…

 

Ovaj vrtuljak zahtijeva JavaScript

evo nas u gradu Dioklecijana…

Nije da smo često tamo ali koji put triba navratit eto jemamo malo slatki problema u banci pa onda kontrola kod likara pa na Voćneme trgu kavica i sinjavanje svi oni koji tu prolazidu ma lipo da ne more bit lipše…Riva se ka ča i mirita zaobilazi u velikome krugu, eto in je…daj ti meni Get, Varoš i Lučac…nakon puste strke i obaveza pravi je gušt sest kod zalogajnice Dioklecijan, ma tu smo se malo udomačili, prije smo znali poč kod Fife ali otkad je Lonley Planet počeja o njima pisat nima kod Fife više mista za sist a kad gren vanka volin čut domače batude ka ča je danas bilo, ijade euri je letilo priko terace, beštimalo se na Liniča i jebavalo se mater onemu ministru iz Varaždina, govorile se sprdaćine o Poteštatu…ma puno lipa atmosfera…Ona je vazela teleče bržole sa gradela sa salaton  a aj san jia gulaš i to dalmatinski ma on van je na pašticadu ali brez slakega…salata od fažola, našlo se malo kupusa lešo i par kunpiri iz slane vode a i okrenili smo po litre domačeg bilega i guštali ka prasci…nakon tega smo se opustili i malo zige – zage  kroz Get došli do auta…ma ko more ovo platit  nima tega na svitu…

Ovaj vrtuljak zahtijeva JavaScript

letrika je u kamenoj kući…

Letrika se počela stavjat dikod gre kroz fuge ali večinom uza kraj i tamo če bit sakrivena sa daskon…evo i nosača za grede oni če se zavarit na L profil tako da drvene grede dobiju na nosivosti a usput je i lipa dekoracija…danas san se dogovorija sa vodoinstalateron da počme sa svojon lavuron.

 

 

dalmacija moja inspiracija…nakon problema evo me opet online…

Eto i to se more dogodit godinama san pisa moj blog i prija par dan je niko izvuka šteker iz makinje i sve je išlo u niku stvar.

 

Ovod ču nastavit pod istin nazivom Dalmacija moja inspiracija i nadam se da čemo i dalje zajedno guštat…pozdrav…